Palatalizacija
Změna městna artikulacije konsonantow abo wokalow do směra twardego njebja (palatuma) (…). Palatalizacija jo proces koartikulacije (resp. fonologiski asimilacije) (…).
Glědaj teke: Ortografiske wóznamjenjenje měkosći. Rozdźěl mjazy měkim a twardym wugronjenim móžo wobwliwowaś wóznam słowa, pśir. Rozeznawanje twardy : měki.
Wěcej wó tej temje na wótpowědnem boce Wikipedije (nimski).
Měke konsonanty
Ako měke konsonanty pomjenjuju se k prědnemu palatalne ([ɲ], [j]) a alweolo-palatalne ([ɕ], [ʑ]) konsonanty, kaž teke afrikaśe [d͡ʑ] a [t͡ɕ]. Dalej słušaju how konsonanty, kótarež su normalnje twarde, ale se palatalizěruju (změkcyju): [bʲ], [dʲ], [fʲ], [gʲ], [xʲ], [kʲ], [mʲ], [ŋʲ], [pʲ], [rʲ], [tʲ], [wʲ]. Palatalizěrowane [dʲ], [fʲ], [tʲ] wustupuju pśedewšym we wupóžycenjach. Stawnje měko, pótakem palatalnje ako [lʲ], móžo se wugranjaś teke ‹l›.
Twarde konsonanty
Ako twarde konsonanty pomjenjuju se wšykne konsonanty, kótarež njeartikulěruju se pśi twardem njebju: [b], [d], [d͡z], [d͡ʐ], [f], [g], [x], [k], [l], [m], [n], [ŋ], [p], [r], [s], [ʂ], [ʃ], [t], [t͡s], [t͡ʃ], [t͡ʂ], [w], [v], [z], [ʐ]. Wětšyna twardych konsonantow ma swóje palatalne abo palatalizěrowane wótpowědniki.