Wugronjenje

Zuk [pʲ] rozeznawa se wót [p] jano z tym, až wugranja se měki. Kśebjat jězyka pśibližyjo se pśi tom twardemu njebju (palatumoju, gl. Tabela zapśimjeśow).

Jo móžno se ten pógib jězyka wuwědobniś z tym, až pśechada se wóspjet pomałem a mimo pśetergnjenja wót wokala [a] na [i] a zasej slědk. Pśi tom njedejali cele wědobnje poziciju gubowu změniś, ale se jano koncentrěrowaś na pógib jězyka.

Gaž jo rozdźělne połoženje jězyka se wuwědobniło, móžomy rozdźěl mjazy [p] a [pʲ] zwucowaś: Wótchylenje pśi wugronjenju [p] a [pʲ] jo słyšaś, gaž konfrontěrujotej se złožce py [pɨ] a pě [pʲɪ]. Rozdźěl w realizaciji ‹p› nastanjo głownje pśez to, až kśebjat jězyka se twardemu njebju (palatumoju) dalej pśibližyjo.

Pśiznamjenja

• njespiwny
• bilabialny
• ploziwny
• měki

Wótpowědujuce pismiki

Zuk [pʲ] wótpowědujo:

• pismikoju ‹p›
  • pśed ‹ě›, ‹i› (pśir. wokale)
  • gromaźe z ‹j› pśed ‹e›
  • (ako jadna z wariantow) pśed ‹j›‹a›, ‹j›‹o›, ‹j›‹u›

Pśikłady

• kupiś
• pětk
• pjelc
• pjaconka

Pokazki

Pśir. zuka [p], [bʲ].

Glědaj teke: Ortografiske wóznamjenjenje měkosći, Rozeznawanje twardy : měki.